Ən çox verilən suallar
Qəzet redaksiyaları üçün
-
1. “Medianın inkişafına dəstək layihələri üzrə elektron informasiya bankı” hansı məqsədlə yaradılmışdır?
– “Medianın inkişafına dəstək layihələri üzrə elektron informasiya bankı” müsabiqələrin təşkili, müraciət üçün tələb edilən sənədlərin qəbulu, müraciətlərə baxılması və nəticələrin elan edilməsi prosesində səmərəliyinin artırılması, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu tərəfindən həyata keçirilən layihələrin yerinə yetirilməsi və həmin layihələr üzrə hesabatların təqdim edilməsi prosesinin sadələşdirilməsi, informasiya mübadiləsinin tamlığının və etibarlılığının təmin edilməsi məqsədilə yaradılmışdır. “Medianın inkişafına dəstək layihələri üzrə elektron informasiya bankı” media subyektləri və nümayəndələri ilə Fond arasında müsabiqələrə dair elektron informasiya mübadiləsini təmin etməklə sürətli və operativ fəaliyyətin həyata keçirilməsinə zəmin hazırlayacaq, bu sahədə elektron informasiya mühitini formalaşdıracaq.
-
2. Qeydiyyat zamanı “Qəzet redaksiyasının elektron poçt ünvanı” xanasında hansı elektron poçt ünvanı qeyd edilməlidir?
– “Qəzet redaksiyasının elektron poçt ünvanı” xanasına şəxsi kabineti yaradılan qəzet redaksiyasına məxsus və işlək vəziyyətdə olan elektron poçt ünvanı daxil edilməlidir. Daxil edilmiş elektron poçt ünvanının qəzet redaksiyasına məxsus olmasına görə redaksiya məsuliyyət daşıyır.
-
3. “Qəzetin əməkdaşları haqqında məlumatı (adları, ata adları, soyadları, tutduqları vəzifə, əmək haqlarının məbləği) əks etdirən sənədin skan edilmiş surəti” xanasına yüklənəcək sənədin forma və məzmunu necə olmalıdır?
– Qəzetin əməkdaşlarının adlarını, ata adlarını, soyadlarını, tutduqları vəzifə və əmək haqlarının məbləğini əks etdirən cədvəl doldurulmalı, qəzetin baş redaktoru tərəfindən imzalanmalı və möhürü ilə təsdiqlənməlidir. Daha sonra həmin sənəd skan edilərək sistemə yüklənməlidir.
-
4. “Qəzetin dövriliyi və tirajı” xanasına məlumatlar hansı şəkildə daxil edilməlidir?
– Bu xanada qəzetin həftə ərzində hansı dövriliklə və hər nömrəsinin hansı tirajla çap olunduğu qeyd edilməlidir. Məsələn, əgər qəzet həftədə 3 dəfə və 2000 tirajla çap olunursa, məlumat xanaya bu şəkildə daxil edilməlidir: Dövriliyi – həftədə 3 dəfə, Tirajı – 2000
-
5. “Qəzetin bank rekvizitləri” xanasının funksional əhəmiyyəti nədir?
– Qəzet maliyyə yardımının göstərilməsinə dair müsabiqədə qalib gəldiyi təqdirdə həmin maliyyə yardımı qəzetin qeyd etdiyi bank rekvizitlərinə uyğun olaraq onun bank hesabına köçürüləcəkdir. Bu səbəbdən bank rekvizitləri düzgün daxil edilməlidir.
-
6. “Qəzetin vebsaytının adı” xanasına məlumat mütləq daxil edilməlidirmi?
– Bu xana vebsaytı mövcud olan qəzetlər üçün nəzərdə tutulmuşdur. Qəzetin vebsaytı olmadıqda bu xananın doldurulması tələb olunmur.
-
7. Qeydiyyat zamanı daxil edilən məlumatlar sonradan yenilənə bilər?
– Qəzetin şəxsi kabinetində mövcud olan məlumatlar istənilən vaxt yenilənə bilər.
-
8. Müsabiqəyə müraciət zamanı neçə layihə-təklif təqdim edilməlidir?
– Müsabiqə Qaydalarının 2.1.1-ci yarımbəndində nəzərdə tutulmuş qəzetlər tərəfindən 3 (üç), 2.1.2-ci yarımbəndində nəzərdə tutulmuş qəzetlər tərəfindən 2 (iki), 2.1.3-cü yarımbəndində nəzərdə tutulmuş qəzetlər tərəfindən 1 (bir) sahə üzrə layihə-təklif təqdim edilməlidir. Belə ki qəzet həftəlik dövrilik üzrə müraciət etdikdə yalnız bir sahə üzrə yazı və tədbirlər planı, günaşırı dövrilik üzrə müraciət etdikdə yalnız iki sahə üzrə ayrı-ayrılıqda yazı və tədbirlər planı (ümumilikdə 2 yazı və 2 tədbirlər planı), gündəlik dövrilik üzrə müraciət etdikdə yalnız 3 sahə üzrə ayrı-ayrılıqda yazı və tədbirlər planı (ümumilikdə 3 yazı və 3 tədbirlər planı) təqdim etməlidir.
-
9. Qəzet redaksiyası tərəfindən birdən çox layihə-təklif təqdim edildikdə onların adları “Qəzet tərəfindən müvafiq layihə-təklifə verilən ad” xanasına hansı qaydada daxil edilməlidir?
– Qəzet redaksiyası tərəfindən layihə – təkliflərə verilən adlar ardıcıllıqla müvafiq xanaya daxil edilməlidir. Məsələn, əgər 2 (iki) layihə təklif təqdim edilirsə, onların adları bu qaydada daxil edilir: 1. “Birinci layihə-təklifə verilən ad”; 2. “İkinci layihə-təklifə verilən ad”.
-
10. Qəzetin baş redaktorunun ərizəsi hansı formada tərtib edilməlidir?
– Qəzetin baş redaktorunun ərizəsi Müsabiqə Qaydalarında müəyyən edilmiş formaya uyğun tərtib edilməli, baş redaktor tərəfindən imzalanmalı, möhürlənməli və skan edilərək sistemə yüklənilməlidir.
-
11. Layihə-təklifin tərkib hissəsi olan yazının həcminə dair məhdudiyyət mövcuddurmu?
– Müsabiqə Qaydalarına uyğun olaraq həcmi 2000 sözdən az və ya 2500 sözdən çox olan yazı sistem tərəfindən qəbul edilmir.
-
12. Müsabiqəyə təqdim edilən yazılar hansı dildə olmalıdır?
– Müsabiqəyə müraciət edən qəzet redaksiyasının təqdim etdiyi yazının dili qəzetin çap edildiyi dillə eyni olmalıdır.
-
13. Tədbirlər planı hansı forma və məzmunda tərtib edilməlidir?
– Tədbirlər planının formasına dair xüsusi tələb yoxdur. Tədbirlər planı məzmun etibarı ilə aid olduğu sahə (sahələr) çərçivəsində keçirilməsi nəzərdə tutulan tədbirləri əks etdirməlidir. Bu plan qəzetin baş redaktoru tərəfindən imzalanmalı və möhürlənməli, daha sonra isə skan edilərək “*pdf” formatında sistemə yüklənilməlidir. Məlumat üçün bildirək ki, hər bir layihə-təklif üzrə ayrıca tədbirlər planı hazırlanmalıdır.
-
14. Müsabiqənin elanından əvvəlki yarımildə maliyyə yardımı göstərilməmiş qəzet redaksiyaları tərəfindən aylar üzrə hansı sənədlər təqdim edilməlidir?
– Qəzetin birdəfəlik tirajını təsdiq edən elektron qaimənin (mətbəə qaiməsi), qəzetin tiraj bölgüsünü göstərən təsdiqlənmiş məlumatın, həmçinin qəzetin abunə və satışına dair yayımçı tərəfindən təsdiq edilən arayışlar və elektron qaimələrin skan edilmiş surətləri təqdim edilməlidir. Qeyd edək ki, müvafiq xanalara birdən çox sənədin eyni anda daxil edilməsi mümkündür.
-
15. Qəzetin tirajına dair mətbəədən alınan elektron qaimələr hansı formada təqdim olunmalıdır?
– Qəzetin tirajını təsdiq edən elektron mətbəə qaimələri son 1 (bir) ilin hər bir ayı üzrə təqdim edilməlidir. Hər bir qaimədə müvafiq ayda çap olunan bütün nömrələrə dair məlumatlar və həmin nömrələrin tarixləri əks olunmalı, qaimələr həm redaksiya, həm də mətbəənin məsul şəxsləri tərəfindən imzalanmış və möhürlənmiş şəkildə sistemə yüklənilməlidir.
-
16. Qəzetin yayımına dair arayışlar və elektron qaimələr hansı sayda təqdim edilməlidir?
– Qəzetin yayımını təsdiq edən arayışlar və elektron qaimələr Müsabiqə Qaydalarında tələb olunan abunə və satış sayını təmin edəcək sayda təqdim edilməlidir. Qeyd edək ki, Müsabiqə Qaydalarına əsasən qəzetin yayımı (abunə və satışı) 1.500 nüsxədən az olmamalıdır.
-
17. Qəzetin yayımına dair arayışlar və elektron qaimələr hansı formada təqdim olunmalıdır?
– Qəzetin yayımını təsdiq edən arayışlar və elektron qaimələr son 1 (bir) ilin hər bir ayı üzrə təqdim olunmalıdır. Hər bir arayışda qəzetin müvafiq aydakı satışı, abunəsi və çatdırılmasına dair məlumatlar qeyd olunmalı və bu məlumatların hamısı elektron qaimədə öz əksini tapmalıdır. Elektron qaimələr həm redaksiya, həm də yayımçının məsul şəxsləri tərəfindən imzalanmış və möhürlənmiş şəkildə sistemə yüklənilməlidir.
-
18. Qəzetin dövriliyi haqqında arayış hansı formada hazırlanmalıdır?
– Bu arayış mətbəə tərəfindən hazırlanmalı və qəzetin son 1 (bir) il ərzindəki dövriliyinə dair məlumatları əks etdirməlidir. Arayış mətbəənin məsul şəxsi tərəfindən imzalanmış və möhürlənmiş şəkildə sistemə yüklənməlidir.
-
19. Qəzetin müntəzəm nəşr olunması haqqında arayış hansı formada hazırlanmalıdır?
– Bu arayış mətbəə tərəfindən hazırlanmalı və qəzetin dövriliyinə uyğun olaraq son 1 (bir) il ərzində davamlı şəkildə çap olunmasına dair məlumatı əks etdirməlidir. Arayış mətbəənin məsul şəxsi tərəfindən imzalanmış və möhürlənmiş şəkildə sistemə yüklənilməlidir.
-
20. Qəzetin tiraj bölgüsünü əks etdirən sənəd hansı formada hazırlanmalıdır?
– Bu sənəd redaksiya tərəfindən hazırlanmalı və son 1 (bir) ilin hər bir ayı üzrə təqdim olunmalıdır. Tiraj bölgüsü müvafiq ayda nəşr olunan hər bir nömrənin tirajının yayımçılar arasında paylanmasını əks etdirməlidir. Sənəd qəzetin baş redaktoru və ya digər məsul şəxsi tərəfindən imzalanmış və möhürlənmiş şəkildə sistemə yüklənilməlidir.
-
21. Eyni müsabiqəyə təkrar müraciət mümkündürmü?
– Qəzet redaksiyasının eyni müsabiqəyə təkrar müraciəti qəbul edilmir.
Müsabiqə nəticəsində qalib elan olunan qəzet redaksiyaları üçün
-
1. Qəzetin tirajına dair mətbəədən alınan elektron qaimələr hansı formada təqdim olunmalıdır?
– Qəzetin tirajını təsdiq edən elektron mətbəə qaiməsi hər ay başa çatdıqdan sonra 3 (üç) gün müddətində həm redaksiya, həm də mətbəənin məsul şəxsləri tərəfindən imzalanmış və möhürlənmiş şəkildə sistemə yüklənilməlidir. Hər bir qaimədə müvafiq (ötən) ayda çap olunan bütün nömrələrə dair məlumatlar və həmin nömrələrin tarixləri əks olunmalıdır.
-
2. Qəzetin yayımına dair arayışlar və elektron qaimələr hansı sayda təqdim edilməlidir?
– Qəzetin yayımını təsdiq edən arayışlar və elektron qaimələr maliyyə yardımı müqaviləsində tələb olunan abunə və satış sayını təmin edəcək sayda təqdim edilməlidir. Qeyd edək ki, Müsabiqə Qaydalarına əsasən qəzetin yayımı (abunə və satışı) 1.500 nüsxədən az olmamalıdır.
-
3. Qəzetin yayımına dair arayışlar və elektron qaimələr hansı formada təqdim olunmalıdır?
– Qəzetin yayımını təsdiq edən arayışlar və elektron qaimələr hər ay başa çatdıqdan sonra 3 (üç) gün müddətində həm redaksiya, həm də mətbəənin məsul şəxsləri tərəfindən imzalanmış və möhürlənmiş şəkildə sistemə yüklənilməlidir. Hər bir arayışda qəzetin müvafiq (ötən) aydakı satışı, abunəsi və çatdırılmasına dair məlumatlar qeyd olunmalı və bu məlumatların hamısı elektron qaimədə öz əksini tapmalıdır. Elektron qaimələr həm redaksiya, həm də yayımçının məsul şəxsləri tərəfindən imzalanmış və möhürlənmiş şəkildə sistemə yüklənilməlidir.
-
4. Qəzetin tiraj bölgüsünü əks etdirən sənəd hansı formada hazırlanmalıdır?
– Bu sənəd redaksiya tərəfindən hazırlanmalı və hər ay başa çatdıqdan sonra 3 (üç) gün müddətində qəzetin baş redaktoru və ya digər məsul şəxsi tərəfindən imzalanmış və möhürlənmiş şəkildə sistemə yüklənilməlidir. Tiraj bölgüsü müvafiq (ötən) ayda nəşr olunan hər bir nömrənin tirajının yayımçılar arasında paylanmasını əks etdirməlidir.
Jurnalistlər üçün
-
1. Jurnalist vəsiqəsinin skan edilmiş surətini kimlər təqdim etməlidir?
– Etibarlı olan jurnalist vəsiqəsinin skan edilmiş surəti ştatlı müxbirlər tərəfindən təqdim edilməlidir.
-
2. İş yerindən arayışın skan edilmiş surətini kimlər təqdim etməlidir?
– İş yerindən arayışın skan edilmiş surəti ştatdankənar müxbirlər tərəfindən təqdim edilməlidir.
-
3. Qeydiyyat zamanı daxil edilən məlumatlar sonradan yenilənə bilər?
– Jurnalistin şəxsi kabinetində mövcud olan məlumatlar istənilən vaxt yenilənə bilər.
-
4. Müsabiqəyə müraciət forması necə tərtib edilməlidir?
– Müsabiqəyə müraciət forması Müsabiqə Qaydalarında müəyyən edilmiş formaya uyğun tərtib edilməli, jurnalist tərəfindən imzalanmalı və skan edilərək sistemə yüklənilməlidir.
-
5. Jurnalist tərəfindən müsabiqəyə təqdim edilən yazının həcminə dair məhdudiyyət mövcuddurmu?
– Müsabiqə Qaydalarına uyğun olaraq həcmi 900 sözdən az və ya 1000 sözdən çox olan yazı sistem tərəfindən qəbul edilmir.
-
6. Jurnalistlər tərəfindən bank rekvizitlərinin təqdim edilməsi zəruridirmi?
– Müsabiqəyə müraciət forması Müsabiqə Qaydalarında müəyyən edilmiş formaya uyğun tərtib edilməli, jurnalist tərəfindən imzalanmalı və skan edilərək sistemə yüklənilməlidir.
-
7. Eyni müsabiqəyə təkrar müraciət mümkündürmü?
– Jurnalistin eyni müsabiqəyə təkrar müraciəti qəbul edilmir.