1. Giriş

Bu istifadəçi razılaşması “Medianın inkişafına dəstək layihələri üzrə elektron informasiya bankı”ndan (bundan sonra – MİB), orada nəzərdə tutulan məlumatlardan, xidmətlərdən və proqram təminatından istifadənin şərt və müddəalarını özündə əks etdirir. MİB-dən istifadə etməklə istifadəçi Azərbaycan Respublikasının Konstitusiyasının, Azərbaycan Respublikasının Mülki Məcəlləsinin, “Kütləvi İnformasiya Vasitələri haqqında”, “İnformasiya, informasiyalaşdırma və informasiyanın mühafizəsi haqqında”, “Müəlliflik hüququ və əlaqəli hüquqlar haqqında” Azərbaycan Respublikası qanunlarının, habelə digər müvafiq qanunvericilik aktlarının tələbləri daxilində formalaşdırılmış qayda və şərtləri qəbul etdiyini təsdiqləmiş olur.

2. MİB-in fəaliyyət istiqaməti

MİB Azərbaycan Respublikası Prezidentinin 2009-cu il 03 aprel tarixli 75 nömrəli Fərmanı ilə təsdiq edilmiş “Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu haqqında Nizamnamə”nin Azərbaycan Respublikasında fəaliyyət göstərən kütləvi informasiya vasitələri haqqında informasiya bankının formalaşdırılmasını nəzərdə tutan 4.1.7-ci yarımbəndinə uyğun olaraq Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu (bundan sonra – Fond) tərəfindən yaradılmışdır.

MİB-in yaradılmasının məqsədi dövlət və cəmiyyət üçün əhəmiyyət kəsb edən, habelə kütləvi informasiya vasitələrinin fəaliyyətinin təkmilləşdirilməsini nəzərdə tutan və inkişafını dəstəkləyən proqramların, layihələrin və digər tədbirlərin həyata keçirilməsinin, müsabiqələrin təşkilinin, müraciət üçün tələb edilən sənədlərin qəbulunun, müraciətlərinin qiymətləndirilməsinin və nəticələrin elan edilməsinin elektron qaydada həyata keçirilməsini təmin etməkdir.

Qeydiyyatdan keçmiş istifadəçi bilməlidir ki, MİB-ə təqdim edilmiş məlumatlar, sənədlər, yazılar, layihələr və digər materiallar Fond tərəfindən müəyyənləşdirilmiş kriteriyalara uyğun olmalıdır.

3. Qeydiyyat və öhdəliklər

1) MİB-in tam xidmətlər paketindən yalnız qeydiyyatdan keçmiş istifadəçilər yararlana bilərlər.

Qeydiyyatdan keçdikdən sonra istifadəçi MİB-in xidmətlərindən istifadə etmək üçün istifadəçi adı və parolu əldə edir.

İstifadəçi adının və parolunun təhlükəsizliyinə, həmçinin bu ad və parol altında həyata keçirilən bütün əməliyyatlara görə istifadəçi məsuliyyət daşıyır.

Fond qeydiyyatdan keçmiş istifadəçilərin portala girişini ilkin xəbərdarlıq etmədən məhdudlaşdıra bilər.

Qeydiyyat zamanı istifadəçi tələb olunan məlumatları tam və dəqiq daxil etməli, həmçinin şəxsi kabinetdə mövcud olan məlumatların aktuallığına nəzarət etməlidir.

Şəxsi kabinetin qorunması və gizli saxlanılmasına görə istifadəçi məsuliyyət daşıyır.

Ad və parolundan razılığı olmadan istifadə edilərsə, istifadəçi bu barədə dərhal MİB-in inzibatçısına xəbər verməlidir.

İstifadəçinin razılığı olmadan şəxsi kabinetindən istifadə edilməklə ona vurulan maddi və mənəvi zərərə görə Fond heç bir məsuliyyət daşımır.

Şəxsi kabinetindən istifadə edilməklə üçüncü şəxslərə və ya Fonda vurulan zərərə görə istifadəçi məsuliyyət daşıyır.

Fond qeydiyyat zamanı daxil etdiyi məlumatların doğruluğunu təsdiqləyən sənədləri istifadəçidən tələb etmək hüququna malikdir.

MİB-ə daxil edilmiş məlumatların düzgünlüyünə görə Fond heç bir məsuliyyət daşımır.

2) MİB-də aşağıdakılar qadağan olunur:

- səlahiyyəti olmadan başqa şəxslərin adından çıxış etmək və özünü nümayəndə kimi təqdim etmək;

- MİB-in normal fəaliyyətinə mane olmaq;

- yanlış, qeyri-dəqiq, aldadıcı məlumatlar daxil etmək;

- MİB-ə məxsus olan əqli-mülkiyyət hüququ predmetlərindən qeyri-qanuni şəkildə istifadə etmək;

- üçüncü şəxslərin müəlliflik hüquqlarını və ya MİB-dən istifadə şərtlərini pozmaq;

- MİB-in iş prinsipinə mane olacaq spam və ya virusları yaymaq.

Əgər Fond müstəsna olaraq öz mülahizəsinə əsasən istifadəçi tərəfindən MİB-dən sui-istifadə edilməsi qənaətinə gələrsə, istifadəçinin portala girişini məhdudlaşdıra, müvəqqəti olaraq dayandıra və ya ləğv edə bilər.

4. Təqdim edilmiş məlumatların yerləşdirilməsi, dəyişikliklərin edilməsi və silinməsi

Fond təqdim edilmiş məlumatların yerləşdirilməsi və ya silinməsi ilə bağlı qərar verməkdə sərbəstdir.

Təqdim edilmiş məlumat və ya onun bir hissəsinin istifadəçinin intellektual mülkiyyəti kimi qorunduğu hallarda istifadəçi Fonda bu məlumatdan istifadəyə icazə vermiş olur.

Fondun istifadəçinin MİB-ə təqdim etdiyi məlumatları yeniləmək öhdəliyi yoxdur.

5. Dəyişikliklər

Fond istifadə qaydalarında dəyişikliklər etməkdə sərbəstdir.

İstifadə qaydalarına dəyişikliklər edildikdə bu barədə istifadəçilərə məlumat verilir.